الأحد، ديسمبر ١١، ٢٠١١

حاجات منسية


في درج المكتب المقفول
حاجات موجودة لو بتزول
بقالي سنين مبصتلوش
تلاهي الدنيا واخداني
وغنوة فقلبي لو بتحوش
وحوش من حزن جواني
بتتسرسب تتوه في الحوش
تدراي فضحكة ندهاني
سريع الوقت في مروره
تلاقي همومي سرقاني
فملحقهوش

فيوم اشتقت للذكرى
وحالي قبل ما بكرا
يغيرني
لواحد تاني معرفهوش
فقلت افتح على امبارح
وأطل بعيني جوا الدرج
برغم إني
قلقت ساعتها
لاحساسي بخوف جارح
فتحت الدرج
 لقيت 
 لعبة بتاعتي زمان
بطل خارق بعضلاته
تملي يكون كمان كسبان
في قصة من خيالاتي

لقيت
جايزة لأحسن رسمة فاعدادي
بين الرسم بالألوان
هواية من هواياتي
دلوقت بس
عرفت إزاي
بقيت فنان
يداري فحزنة والعنوان
يخليهم قوام عصفور
يزقزق ضحكة
وقت الضلمة
يصبح نور

لقيت
أول قصيدة حب فعنيها
وجنبيها بقايا لوردة شايلاها
في أحضانها ...تواسيها
برغم إن الدموع جفت
ورغم إن الحروف خفت
معدش الرد يعنيها

لقيت
مصحف بتاع جدي
ومنه كان يحفظني 
في قرآني
وفي الجامع ياخدني معاه
أقوم أقرأ في كام آيه
وبعدي هوا بيأذن
برغم إنه كبير في السن
آذانه كان كدا حكاية

ولقيت سبحة
بياضها لون بياض قلبه
ولسة مواظبة عالتسبيح
كإن صوابعة شايلاها
برغم إن السنين مرت على موته
بحس إنه هنا معايا
في لحظة مالشموع بتسيح
يقيد في الضلمة شمعايه

لقيت
 صورتي وأنا صغير
يادوب شنبي بيتلخص
في كام شعره كدا تحير
وأنا بضحك بعلو الصوت
في اللحظة دي بالذات
عرفت ليه بحس
إن الصور بتموت
الصورة في الأصل كئيبة
والضحكة هي الألوان
زي النايات بالظبط
حلاوتها في الأنغام
وعرفت إني
لحظة ما اعتزلت الضحك
كبرت سنين
نسيت الدرج هنا مقفول
ونسيت أنا مين
*
*
شعر/ أحمد محمد زهران

حلم من سكر


ليللاتي كتير أنا
بسهر
واخططلك
في موقف عادي
يتكرر
وأنسج حلم من سكر
ولايمرر
وأجهزلك في كلماتي
وأبدأها
سلام وسؤال
وإزيك
صباح الخير
وإيه الأحوال
وأطلب منك الكشكول
وأستفهم في أي كلااام
عشان أتملى في عيونك
وأتمنى كلامي يطول
فازيد في القول
واتمتم وٍرد يحميكي
من النظرات
وفي الأحلام
أكون فارس
ومستني
إشارة واحدة
مالنني
عشان أركب
حصان أبيض
كما الرهوان
وأنقذ حلمك المجنون
إكمني
بحبك مووت
وببقى كمان
ولد شاطر
مجهز نفسي
لاحتمالات
جواباتك لسؤلاتي
ويبقى الرد في عقلي
كمان حاضر
عشان خاطر
أطمن قلبك النونو
بإني أمنت
بمشاعري
وإني أمنت
بظنونه
وفي حضورك
تاخدني الدهشة
في كونك
يتوه النبض
في الإحساس
حَمار الورد عالخدين
يخليني كمان محتاس
وتتلخبط عباراتي
ويتلجم حصان الشعر
في لساني
ونبض القلب في صدرك
يكون قاضي
ويصدر حكمه بالإنصات
ونور الشمس في عيونك
يخليني تمام راضي
فدى النظرات
وأقف عاجز
أمام ضيك
بدون كلمه
وابان خايب
وأبان فاضي
وأنسى كل تخطيطي
بضحكة بريئة مالشفتين
وغمازة تدوبني
في دوامة بدون أخر
وأنا عطشان
ومش قادر
أنول وأشرب
ومش قادر
أسيب وأهرب
دا حتى سؤالي
عالكشكول
بيتبخر
في لحظة مالهوا يحرك
في شعراية من القُصة
وبيخليها تتمختر
على جبينك وتتمايل
في أجمل رقصة منفردة
شافتها العين

كدا رضيتي
أديني نسيت
كمان إسمي
ومش فاكر أنا من فين
ومش فاكر أنا واقف
هنا من إمتى
يمكن ساعة أو ساعتين
هبوح إمتى
بمكنوني
وإمتى
تطلقي جنوني
ويتلاقى بقى
القلبين
أنا مش قادر أتحمل
جمالك كل يوم بيزيد
وقلبك القاضي
يوماتي حكمه
 بالإنصات..
يزيد عمرين
وأنا مش قادر أتحمل
وأتمنى
أكون جنبك
ولو شبرين
ولو قتلتني نارالشمس
في عيونك
أموت وأبقى
شهيد العين
*
*
شعر/أحمد محمد زهران

الجمعة، نوفمبر ١١، ٢٠١١

جوا العيون


يا أم العيون المسكرة

والمنقذة والمبهرة

يا شايفة روحي

من خلال

عاتمة زايدة

وأبخرة

مليانة أشباح الخيال

والحلم متسلسل سنين

متغطي مكسي

بالمحال

والضحكة جوا القلب

ساكته ومتحجرة

مالحزن خايفة

ومتنكرة

فقالب خشب

ياللي عيونك جوهرة

شاربة من سحر العجب

لما عيونك أشرقت

على ضلمة القلب

اللي مخنوق من زمن

أصبحت

كل الأماني

ممكنة

واتحرر الحلم الجميل

لما المحال

دفع التمن



يا أم العيون المنقذة

والمسكرة والمبهرة

جوا عيونك أمكنة

متلونة بطعم الحياة

مهجورة

مفيهاش بشر

لكن فؤادي اللي عبر

كل المصاعب والخطر

واتحققت أمنيته

فجأة نسى

كل المتاعب والشقى

واتغطى بالجفن

الحنون

لما لمح جوا العيون

فرحة الشوق واللقا

من روح بياضها

كالقمر
*
*
شعر/أحمد محمد زهران

صرخة


لما الدموع الحيرانين

يتسرسبوا

من غير إرادة

يتقلبوا فوق خد وحدة

بتتولد جوا النفوس

والحلم تايه في الغيوم

المسكونين بتلال ألم

تعمي العيون

تخفي الشموس

تكسر رايات

قصة كفاح ضد الحياة

تهدم عروش

متحملة بجبال إرادة

والأمل

تهدم مداه...




صرخة إيمان

متلونة بنور الهداية

تنطلق

تخترق سجن العذاب

اللي اتبني جوا النفوس

وقت انسحاب

كان المرض سببه الملل

وموت العزيمة مالبداية

وقبل لحظة من نهاية حالة

عصرت قوتك

تكتشف

ان الدمع اللي نزل

كان صرختك

كان الإشارة

وان الجرح اللي افتكرته

طاب واندمل

علم في روحك

سابلك أمارة
*
*
شعر/أحمد محمد زهران

مركب شراع


أتمنى أكون في القلب

مركب شراع راسي

ولا إني أكون في الحب

كلمة في كراسي

تيجي تنادي ف يوم

وتصحي فيا الألم

إيه ذنبي يا عاشق

بقيت ناسي

تتركني للوحدة الغريبة

ميت زمن

والقلم في الحشى

راشق وبيقاسي

إمتى هيجي اليوم

وتفض التراب عني

لاجل ماشوف الضي

ورمشها والنني

وأرجع وأقول مسكينة ما تعرف

إن الفراق كان منها ومش مني

وإن الكلاام كان صعب

وإن السكات كان أصعب

وإن الحنين كان يصعب

لكن.. كان غصب عني
*
*
شعر/ أحمد محمد زهران

كنــت حــاضـــر


في المحاضرة ناس بتيجي

دماغها حاضر للدروس

عايزة تبقى لما تشقى

ترتقي فوق النفوس



في المحاضرة ناس بتحضر

جاية تلعب بس منظر

أصلها بتاخد دروس

والتميز والكؤوس

مين هيتعب مين يذاكر

في النهاية أكيد يفوز


في المحاضرة بنت حلوة

ماسكة ريشة في ايدها غنوة

والقصايد من عنيها

نهر عمره ما ينتهي

نهر تعبان مالسهر

كل همه يلاقي قلب

قلب صافي كله حب

قلب صادق يسكنه

قلب عطشان للغرام

نفسه لحظه يرتوي

والشفايف عازفة لحن

حلم لسة بيبتدي

مالشفايف لو هتحكي

تسمع الصوت الندي

والقلوب تسمع تميل

والقوام عمال يميل

والعيون شغالة تحسد

فالجمال من ألف ميل


في المحاضرة ناس بتكتب

ناس تفكر ناس بترسم

في الهوى من كل لون

مالقلوب مشتاقة يوم

لو تحسه من جديد

لو يكون إحساس حقيقي

مش مجرد يوم سعيد

أو يكون حلم وسراب

طار وسافر فوق بعيد



في المحاضرة ناس بتيجي

لاجل ما تشوف الحبيب

لو حزين أو كان سعيد

مالخدود فيها شمعة

يوم بتطفي يوم تقيد

لو يغيب الضي مرة

الحبيب يزعل أكيد


في المحاضرة ناس حزينة

قلبها كان ورد بلدي

داس عليه جرح الحبيب

انتهى بقى ورد زينة

ما القلوب كانت أمينة

مالعذاب

اتلخبطت فيها المشاعر

اتحولت صبحت عجينة

والأسية عودتها

ازاي تكون صعبة ولئيمة



المحاضرة كان كلامها عالمشاعر

إزاي بتوصل للقلوب

وإزاي أكون بغيري شاعر

وازاي أعيش انسان فريد

من غير عيوب

الكلام مكانش واضح

والوضوح كان مش أكيد

والحكاية

ان أخر صف صعب

تشوفه واضح من بعيد

والصعوبة

إني حاضر مالبداية

مش مركز

اوعى تحسب

اني كنت فيوم بليد

الحكاية

اني شفت بنت حلوة

ماسكة ريشة في ايدها غنوة

قمت سارح فالخيال



والمحاضر جه سألني

احكي يابني عالمحبة والمشاعر

كيف تقلل في المحال

وازاي تكبر فالحياة

وازاي تزود في الجمال

واوعى تحسب

اني ممكن أنسى اسمك

أنسى شكلك

لو لمست في الإجابة

لعب أو حتى احتيال



قمت قايم

رحت قايل

لو تعيد بس السؤال

أصلي سامعك من بعيد

والصراحة

الجواب صعب ومحال

والسؤال أعمى وعنيد

انت فاكر اني ممكن

أجي وأوصف فالمشاعر

والغرام

دا استحالة

اني ألخصهم في كلمة

أو في سطر من الكلام

واوعاك تفكر

إني بهرب مالإجابة

لاجل نقص أو زيادة

في العلام

تبقى مش فاهم تمام

الحكاية والصراحة

كنت حاضر مش مركز

مالبداية

أصلي جيت مالبيت مريض

والحرارة عندي عالية

والمشاعر فالحضيض

لو مصمم عالإجابة

انصحك

تسأل الطفل الوليد

أصل قلبه

لسه صافي لسة خام

مش مقطع مش مكسر

فيه لحام

والمحاضرة لما تخلص

هاجي عالمكتب قوام
*
*
شعر/ أحمد محمد زهران

قبل ما يفوت الأوان




مصر يا سايبة الولاد

للي يسرق واللي ينهب

واللي يشجع عالفساد

كله هم وكله غم

واللي ينطق

تقتلي فيه الضمير

وتعلمية فن السكات

مصر يا بلدي الأصيلة

ياللي كانوا فيكي يحكوا أيام زمان

يحكوا عن سمرة ولادك

يحكو عن كرمك ودادك

يحكو ويزيدوا في حلاتك

يحكوا غيرتك عالولاد

وقفتك ويا البلاد

وكانوا يحكوا عالعبور

لكن خسارة دلوقتي اتحول

طابور

مصر ياللي كنتي في يوم صبية

حلوة وشديدة وقوية

إيه جرالك بس قولي؟

شيبتي في عز الشباب!

سيبتي ولادك للكلاب!

اللي ينهش واللي ياكل

علموكي إزاي يا حلوة

كيف تحركي الشفايف

بدلوا الكلام لغنوة

خلو صوت الحق خايف

خلو فيكي الدم سايل

حاله مايل مش يغير

عجزوا فيكي الضمير

موتوا النفس الأبية

كسروا في عزة شبابك

عودوا المظلوم يهابك

وانتي أمه !!

عودوكي عالأسية

لما نيجي ندق بابك تقفلية

ترزعية في وشوش ولادك

وتسيبيهم يغرقوافي بحور عذاب

كل دا علشان خواطر

اللي باعك واللي ساب

واللي قضى سنين حياته

يسرق الضحكة في عنينا

ينهب اللقمة في ايدينا

وعمره ما تااااب

مصر
ياللي كنتي في يوم

عنوان للثقافة

خلوا فيكي الفن

رقصة حلوة مالغزية

والشباب عالقهاوي

قاعد يتفرج عليها

لو يمين تروح يروحوا

لو شمال تروح يروحوا

والمصيبة هي هي

عقلهم كترت جروحة

معذورين

مالعلام بقى فيكي بايظ

والذكي ضاع عمره لايص

والعتاب بقى طعمه صايص

يلا فوقي فوقيهم

خلي صوت الحق يدوي

خلي نور العلم يضوي

إرجعي يلا فتيه

إطردي البذرة الغبية

إخلعي جذر الفساد

من أراضيكي الندية

قبل ما يفوت الأوان

يلا فوقي فوقيهم

قبل ما يموت الأمان

وتنطفي ف قلوب ولادك

أخر شمعة مالحنان

يلا فوقي فوقيهم

عرفيهم ان مرضك

عمره ما يقضي عليكي

وان صورتك العفية

باقية جوا في عنيهم

وان خيرك لسة جاي

هيداويهم ويراضيهم

وانك الأم الحنونة

اللي ما تنسى ولادها

وان جا يوم وحسوا ظلم

يلقوا ايدك بين ايديهم

وان جا يوم وحسوا ظلم

يلقوا ايدك بين ايديهم

 *
*
شعر/ أحمد محمد زهران